ས་རཱ་མཐོ་སློབ་ཀྱི་རྩོམ་རིག་དགེ་རྒན་དང་རྩོམ་པ་པོ་གྲགས་ཆེན་སྤྲེལ་ནག་པ་བློ་གྲོས་དཔལ་བཟང་ལགས་ལ་བཅར་འདྲི་བྱས་འདུག

ས་རཱ་མཐོ་སློབ་ཀྱི་རྩོམ་རིག་དགེ་རྒན་དང་རྩོམ་པ་པོ་གྲགས་ཆེན་སྤྲེལ་ནག་པ་བློ་གྲོས་དཔལ་བཟང་ལགས་སུ་འཅའ་འདྲི་ཞིག་བྱས་འདུག

གཅིག   གླེང་བྱའི་གནད་དོན་གྱི་ཁ་ཕྱོགས་བཤད་པ།

            ཁོ་བོས་འདི་ལྟར་བཤད་ཚེ་མཁས་པ་འགས་རང་རེའི་སྐད་ཡིག་ནི་འཐུས་ཚང་ཞིག་ཡིན་པས་བསྐྱར་དུ་འཐུས་ཚང་བྱ་རྒྱུའི་གནད་དོན་ཞིག་མེད་ཅེས་གླེང་ངེས་རེད། ང་ཚོའི་སྐད་ཡིག་འཐུས་ཚང་དང་ཀུན་འདུས་ཀྱི་སྤོབས་པ་ཡོད་པ་ལེགས་ན་ཡང། དེའི་དཔེར་མཚོན་ནི་ཚིག་མཛོད་རྣམས་རེད། ད་ཡོད་ཚིག་མཛོད་ཁག་ལ་བསམ་ན་མེད་པ་ནས་ཡོད་པར་གྱུར་པའི་ཆ་ནས་དངོས་གནས་རིན་ཐང་དང་ཕན་ཐོགས་ཆེན་པོ་རེད། ཚིག་མཛོད་དེ་དག་གིས་ཀློག་པ་པོ་དང་།  རྩོམ་པ་པོ།  ལོ་ཙཱ་བ།  ཞིབ་འཇུག་པ་སོགས་ལ་ཕན་ཐོགས་ཚད་མེད་བྱུང་ཡོད། ད་ཡོད་ཀྱི་ཚིག་མཛོད་ནང་ལ་བོད་ཀྱི་རིག་གཞུང་ཁག་གི་ཐ་སྙད་གང་མང་ཞིག་འདུས་པ་ཙམ་ལས། རིག་གཞུང་གི་སྔར་ཡོད་ཀྱི་ཐ་སྙད་ཆ་ཚང་འདུས་ཐུབ་མེད་ལ། དེ་ལས་གལ་ཆེ་བའི་དམངས་ཁྲོད་ཀྱི་ཐ་སྙད་ནི་ཐོ་རེ་བ་ལས་ཕལ་ཆེ་བ་གཏན་ནས་འདུ་ཐུབ་མེད།